Canlubanger

Palitan na ang Pangalan ng NewLab

2008-04-16T11:48:00.004+08:00

Nung unang taon ng DLSC, ang ginagamit naming Computer Lab ay ‘yung nasa dulo ng East Wing ng 3rd floor, na ang pangalan pa noon ay ComLab.

Sa sunod na taon yata nabuksan ang 4th floor, at kasabay nito ang bagong Computer Lab. Ang alam ko, internal name lang yung NewLab... wala naman kasing maitatawag sa bagong computer lab, kaya ang tinawag sa bagong lab ay New Lab. Ang pangalan na kasi ng rooms, letter kung nasaang Wing siya (E for east, and W for west), tapos number nung floor, at kung pang-ilang room ito mula sa gitna. Kaso nga, nasa gitna ng 4th floor ang New Lab, kaya walang naging angkop na pangalan. Kaya kahit sa papel, New Lab na lang ang tinatawag sa kanya.

Kaso, makalipas ang ilang taon, parang di na angkop ang pangalan ng NewLab. Kapag nakita ng New Freshmen, iisipin nila na bago, kasi nga NewLab, na baka sila ang bibinyag, at kahit na well maintained naman at di naman mukhang luma, kahit unang pagpasok ng mga students natin na graduating na ngayon (‘yung mga on time na four years) ay nandyan na ‘yan. New pa ba ‘yon, e ilang taon na ‘yan.

Ang pinakamalaking problema ay paano gagawin natin pag nagkaroon uli ng bagong computer lab. Ano itatawag natin? NewerLab? Kapag hindi kasi, baka isipin ng mga New Freshmen na mas bago pa ‘yung NewLab. Panget at nakakalito naman kung ‘yung mas bago ‘yung tatawagin na nating NewLab at 'yung NewLab ngayon ay tatawagin na nating OldLab. E kaso, paano pag may ginawa pang mas bago sa NewerLab? NewestLab? Paano kung may ginawa pang mas bago sa NewestLab? ThisIsActuallyTheNewestLabAndTheLabKnownAsNewestLabIsNoLongerActuallyTheNewestLabAsThisIsActuallyNewerThanThatLab. Ang mabigat, paano kung may gawin na mas bago pa dun? ThisIsActuallyTheNewestLabAndTheLabKnownAsThisIsActuallyTheNewestLabAndTheLabKnownAsNewestLabIsNoLongerActuallyTheNewestLabAsThisIsActuallyNewerThanThatLabIsNoLongerActuallyTheNewestLabAsThisIsActuallyNewerThanThatLab. At paano kung may gawin na mas bago pa dun?! Well, you get the picture, recursive na lang ‘yan.

Kaya napapanahon ng palitan ang pangalan ng NewLab. Para di na kayo mag-isip, ako na magrerecommend ng pangalan. I suggest we call it Encarnacion Lab.

Pero since paalis na si Doc A, sige na nga, Azcarraga Lab na lang.

May Mayaman ba Talaga sa La Salle?

2008-04-10T11:12:00.002+08:00

Nung wala pa ko sa La Salle, ang tingin ko sa mga Lasalista mayayaman. ‘Yun naman yata talaga paniniwala ng mga tao sa labas. Tapos, nakapasok ako sa La Salle.

Iniisip ko, mayaman na mayaman ang La Salle. Bilang College Prof, nakasama ako sa isang SWOT analysis ng school, kasama ang ilang staff at I.S. teachers (elementary-high school teachers). Kaso, nung nagsuggest ang ibang staff at I.S. teachers sa recommendation part, sabi lakihan daw ang sweldo nila. Kaso, hindi pinansin ng school; baka malugi ang school pag nilakihan ang sweldo. So, hindi pala ‘yung school ang mayaman.

Nung nagpunta ako sa Accounting, at may tinanong ako na may patungkol sa sweldo ko, kinantyawan ako, malaki daw sweldo ko kasi College teacher ako. Naririnig ko rin na may mga I.S. teachers na nagrereklamo kasi mas malaki daw sweldo ng mga College teachers. So, ‘yung mga college teachers ang mayayaman? Pero pag tiningnan ko mga tao sa faculty room, hindi naman sila mga mukhang mayayaman. Kalimitan nga nakikisabay lang sila sa may sasakyan, kahit sa estudyante (talo pa sila ng estudyante), kasi mga walang sariling sasakyan. Ni hindi nga sa La Salle grumaduate karamihan at karamihan state university galing dahil mga can’t afford to study in La Salle. So, ibig sabihin, hindi 'yung mga empleyado 'yung mga mayayaman.

Inisip ko, baka nga ‘yung mga college students. Kaso, sabi nung head ng isang org na inadvise ko, kung mag-fu-fund raising, ‘wag daw sa college magbenta, dapat daw ang target market yung I.S. students (elementary-high school students), kasi daw yun yung mga mapepera. So, baka hindi ‘yung mga college students, kundi mga I.S. students. Pero pag hinoldap mo naman yung mga I.S. students, wala din namang perang maibibigay ‘yang mga ‘yan. Magkano lang pera nila sa bulsa? Kaya nga kung gagawan mo ng katarantaduhan na makukulong o mapapatay ka, kidnap, hindi holdap, para sa mga magulang ka hihingi ng perang pang-ransom. Kaya nga naisip ko, hindi ‘yung mga estudyante ‘yung mayayaman, ‘yung mga magulang nila.

Pero pag nagtaas ng tuition ang school, magrereklamo ang mga magulang. Mayaman na daw ang La Salle, magtataas pa ng tuition. Eh kaso, di ba, kasasabi ko nga lang sa simula na di naman pala mayaman ang school.

So, may mayaman ba talaga sa La Salle?

Ang kasulatang ito ay likha lamang ng mapaglarong isipan na ang tinutukoy na La Salle ay La Salle Canlubang, at sadyang kuro-kuro lang ang ibang bahagi ng mga salaysay para lang may maikwento. Alam kong hindi siyentipiko ang mga konklusyon nito at ni hindi ko man lang alam kung tama ang spelling ko ng siyentipiko at konklusyon. Kung hindi ka naaliw ay ‘wag mo na lang basahin.

Canlubanger ka ba?

2008-04-01T15:35:00.002+08:00

Saan ka nakaka-relate dito?

1. Kahit ang pangalan ng dentista natin ay Doctor Ambrosio, alam mong hindi siya ang tinutukoy pag sinabing Doc A.

2. Sawa ka na sa katagang “wala sa Canlubang ang La Salle Canlubang.”

3. Hindi ka man lang nagtataka bakit ang tawag sa NewLab ay NewLab gayong ilang taon na ito.

4. Hindi ka man lang nagtataka bakit may fashion show taon-taon gayong wala naman tayong course o subject na patungkol dito.

5. Kapag sinabi ng kaklase mong eleven o’ clock ang klase nya, iniisip mo na ang ibig niyang sabihin ay 11:20.

6. Lagi mong naririnig ang mga kaklase mong nagrereklamo tungkol sa La Casita, kahit dun pa rin naman sila kain ng kain.

7. Ayaw mong bumili ng diskette sa bookstore sa ibaba.

8. Sinubukan mo nang ipronounce ang pangalan ni Ms. Scheherezade Ruivivar, at hindi ka man lang nagtataka bakit H at Jeng ang palayaw nina Ms. Ethel Fernando at Ms. Christine Gendrano.

9. Alam mong si Ms. Buyser at Ms. Punzalan ay iisang tao.

10. Alam mong ang teacher na may pinakamahabang buhok ay hindi babae.

11. Hindi mo kilala lahat ng teacher sa faculty room, pero kilala mo kung sino si Ms. Pat, Ms. Jenny, Jigs, Emil, at sir Percy.

12. Bagamat sikat na kataga sa La Salle system ang salitang “Animo”, kapag narinig mo sa ordinaryong usapan ang salitang Animo sa school, mas una pang napasok sa utak mo na isang Theater organization ang tinutukoy.

13. Hindi ka naghahanap ng sarili mong kopya ng student publication.

14. Kapag sinabihan kang papasok ang kaklase mo sa 420 class nya, walang ibang kahulugan na pumapasok sa isipan mo.

15. Naririnig mo ang kaklase mo na sinasabing mas magaling ang course niya kaysa sa ibang course, kahit na sa totoo lang ay marami na siyang binagsak na subjects sa course niya.

May naiisip kang idagdag? Email mo sa canlubanger@gmail.com (subject line: Canlubanger ka ba?)